15‏/5‏/2007
لا أنا جاي أهرّج
أثناء مشاهدتي للتلفيزيون منذ حوالي يومين ، كان البرنامج المعروض حينها هو 90 دقيقة تقديم معتز الدمرداش وأخت أخرى لا أعرف اسمها تحديدا ... ما علينا

في الفقرة الأخيرة من البرنامج ، تم تناول حادث سيارة أدى إلى وفاة أحد الأشخاص .. واستضاف البرنامج أخي المتوفى ليتحدث عما حدث وما إلى ذلك

إلى هنا والأمر لا بأس به .. ولكن حينما انتهى الضيف من كلامه ، بدأت الأخت المذيعة في الخروج من حالة الحزن والمشاركة الوجدانية مع الضيف ، وارتسمت ملامح البشر على وجهها حينما بدأت تزف للمشاهدين خبرا سعيدا - أثناء جلوس الضيف - بأن النادي الأهلي قد فاز على ماعرفش ايه كده وأن هذا الخبر موجه لجماهير الكرة الـ .... الخ الخ

يتبادر إلى ذهني بشدة ذلك المشهد الخالد من فيلم الكيف .. في سرادق العزاء حينما انفجر يحيى الفخراني ضحكا ، وحين التفت اليه أحد الجلوس قائلا
انت جاي تعزي والا جاي تهرج ... أجابه يحيى ضاحكا : لا أنا جاي أهرج

سمك لبن تمر هندي .. نعم .. لابد أن يتم تسمية البرنامج - أو على الأقل الحلقة السابقة - بهذا الاسم بدلا من اسمه الحالي .. أين مراعاة مشاعر الضيف ، بل أين مراعاة التنسيق بين فقرات البرنامج وتحديد ما سيتم اعلانه الآن وما سيتم بعد 5 دقائق من الآن .. لا أعلم .. ولكن يبدو أن هذا هو حال الإعلام المصري بوجه عام

التسميات:

 
posted by سيدوفسكي at 4:18 م | Permalink |


10 Comments:


  • At 15 مايو 2007 10:30 م, Anonymous mlame7

    عندك حق يا مهاب بجد حاجات تغيظ جداً انا شوفت الفقرة دي بس من نهايتها واستغربت جداً بعد ما كانت المذيعة رسمه على وشها حالة من الحزن فرحت وزفت الخبر السعيد زي ماقالت !!!!!!!وكمان الرجل كان لسه موجود!!!!!!!!!! حاجه تشل فعلاً
    مش عارفه بجد ايه دا؟؟؟؟؟؟؟؟؟؟؟؟
    هي مش عارفه ان في حاجه اسمها مصداقيه ؟؟؟؟؟؟؟؟؟؟؟؟؟؟؟؟؟؟؟؟؟
    mlame7.blogspot.com

     
  • At 16 مايو 2007 12:52 ص, Blogger صــ خ ـــب شـــيماء

    سلام عليكم
    ايه الكلام اللى ينرفز ده بقىى
    انا ماشوفتوش الحمد لله.. بس اصلا يعنى البرنامج ده مش بطيقه من الاتنين المحترمين اللى بيذيعوه - كراهيه لله فى لله زى ماتقول كدا - هو والبيت بيتك برنامجين اوووف خنقه درجه اولى
    بس بجد .. شئ يكسف مافيش ادنى مستوى من احترام مشاعر الاخ اللى قاعد قدامها ده؟ده اخوه لزم كدا يعنى زعلان عليه مش بيمثل..
    ولا المشاهدين اللى بيشوفوا البرنامج ومتاثرين بالاخ ومشاكينه مشاركه وجدانيه نوعا ما المفروض انهم يقلدوها ويقوموا يههللوا علشان الاهلى كسب ؟ ويقوموا يسمعوها زرغوطه كدا ويتناسوا البنى ادم اللى المفترض عنده مشاعر ده اخوه مااات مش جوز امه

    سلام احسن بجد مستفزه ومش عارفه انا اصلا رديت ليه
    ربنا يهدى

     
  • At 16 مايو 2007 9:32 م, Blogger Malaka

    أولا دي اسمها حاجات "تشيل" ليه بقى؟
    لأن الشلل الأولاني اللي من غير ياء ده أرحم بكتير من اللي بشوفه في البرنامج ده
    حاجة تغيظ والله فعلا ثم إن والله المفروض أخو الشاب المتوفي ده كان يقولها الله يلعن الأهلي على سنينه هيرجع لي أخويا تاني ولا ايه؟
    عالم مستفزة
    ومفيش اي احترام لمشاعر الغير خاصة وإنه جاي علشان ياخد حق أخوه اللي مات وهو ملوش ذنب
    لكن نرجع ونقول ده العاااادي
    هو من امتى حد في البلد دي بيحترم غيره اصلا؟

     
  • At 16 مايو 2007 9:32 م, Blogger Malaka

    نسيت أقولك إن المذيعة اسمها مي
    يعني مش كفاية مستفزة
    لأ وكمان اسمها مي
    شفت الخنقة؟

     
  • At 17 مايو 2007 4:41 م, Blogger سيدوفسكي

    mlame7
    ------
    غير المصداقية كمان يا ملامح .. على الأقل التنسيق .. ترتيب الفقرات أو الأخبار عشان كل خبر يناسب وقت إعلانه .. ده لو فكرنا تفكير يخلو من المشاعر الانسانية خالص

    ===================================
    صـ خ ـب شيماء
    -------------
    لا انا ماعنديش مشاكل في مذيع/مذيعة بعينه .. الاعتراض كله على التهريج اللي حصل ده ليس إلا .. كمان انا زياراتي للتليفزيون مش كتيرة ، فمابلحقش أكره أو أحب حد .. المهم

    كمان حاجة بخصوص ضيف البرنامج .. لاحظي أن أخوه ده مات بحادثة سيارة + التعقيدات اللي حصلت لما كانوا عاوزين يطلعوا تصريح بالدفن .. يعني تأثره هايكون أكبر لو الأمر كان وفاة طبيعية مثلا أو ما شبه .... لكن نقول ايه .. لا حياة لمن تنادي

     
  • At 17 مايو 2007 4:46 م, Blogger سيدوفسكي

    ملكة
    ----
    تعرفي .. انا لو كنت مكان الشاب فعلا .. كنت قمت بأمور كتير في قلب الحلقة كداهو .. بس مضطر أحذفها مراعاة للحياء العام

    يبدو أن البرنامج - كمعظم أمثاله - لا هم له إلا تحقيق السبق الصحفي المجرد ... بغض النظر عن أي اعتبارات انسانية أخرى

    ////////////////////////////////

    ايه ده .. المذيعة اسمها مي ؟ يا للقسوة ! .. طب وايه المشكلة طب ؟
    عامة مشكرين على تعريفي بالاسم .. والرد برض"ك" .. ربنا يخليكي

     
  • At 18 مايو 2007 4:54 م, Anonymous وئــــــــــــــــام

    بسم الله
    هاللو مهابي..ألحيت كتير انى أقرأوكمان أعلق ..على أساس ان وقتى كتييييييييير ..هاقول جديد!!!لا..كل تعليقي هيحوى كلام من نوعية استفزااااز_مافيش احترام_الإعلام بايظ..وفى الاخر هطالبك بالمزيد من كتاباتك..آخر حاجة(لانى أختك الكبيرة باه ولازم أعمل منظر ..قوم ذاكر..أ‘صر انت وأصحابك لموووون كتير وذاكروا..ليه اممممممم..مش عارفة)
    سلامون عليك..وئــــــــــــــــــام

     
  • At 20 مايو 2007 7:32 م, Blogger سيدوفسكي

    وييييئاااااااااااا
    ------------------

    دا ايه النور ده .. يا مرحبتين تلاتة أربعة


    أنا ألحيت تقري ؟ .. لا لا .. بلاش ظلم .. دا هم بس بتاع شهرين تلاتة باطلب منك تقري وكداهوات ّ!!! .. مش كتير ولا حاجة !!!#@$^&**#@!!!*

    بالنسبة للتعليق .. فهو صحيح معاكي حق هاتقولي ايه .. يعجبني أنا الروح العملية داهيات

    المذاكرة ؟ .. لعلمك أنا النهاردة - وياللغرابة - اكتشفت أني قدرت أفهم حوار المادة دي ماشي ازاى وربطت الدنيا ببعض .. ماعرفش ايه حبي في المذاكرة في آخر لحظة .. يمكن الواحد بيميل - على رأي أحمد خالد - أنه يعيش على الحافة والحاجات دي ؟

    سلاموووون عليكي ... مهـــــاب

     
  • At 24 مايو 2007 3:23 م, Blogger Desert cat

    اساسا ده العادى يا مهاب
    هو من امتا كان فى تنظيم
    انت تتضايق لما تلاقى حصل تنسيق
    او تلاقى البرنامج بيتناقش ف قضية معينة وميسمحش للاخبار التافهه تتتخلله هو احنا ايه اللى باقى لنا مش سمك لبن تمر هندى ولا عرق سوس حتى
    احتراماتى

     
  • At 5 يونيو 2007 6:25 ص, Blogger سيدوفسكي

    Desert cat
    -----------

    لا انا مش هاضايق لما يحصل تنسيق ولا حاجة .. انا هاندهش اه وهايسقط فكي الأسفل في بلاهة - على رأي نبيل فاروق - وهاقرص نفسي عشان أتأكد أني مش باحلم .. وبعد القرصة هاتأكد أني كنت باحلم

    منورة يا نانا .. وتأسفات عميقات على التأخير في الرد