30‏/8‏/2007
التاج .. وأنا
أخيرا عبرني حد وبعتلي تاج وحركات من بتاعت المدونات دي التاج - كما هو متوقع - من ملكة .. وهو الأول اللي أتلقاه ، و الأخير على أغلب الظن .. وبطبيعة الحال قعدت كتير لحد ما قلت أتخلص من حالة البلادة اياها وأبدأ أكتبلي كلمتين
ما علينا .. خلينا ندخل في الموضوع و نشوف ايه حكاية التاج ده

ـ اسم مدونتك؟

شخابيط في الخلاط

ـ لماذا اخترته وماهي نيتك من وراء اختياره؟

لأني فاشل غالبا في اختيار عناوين ، ولأني فاشل برضه في أني أستقر على حاجة معينة أكتب عنها ، فقلت أن المدونة هاتكون بقى كوكتيل .. أكتب فيها عن أي حاجة في أي اتجاه .. و لذلك هي شخابيط .. و هي في الخلاط لأنها غير مرتبة .... ونيتي من وراء اختياره أكيد كل خير يعني

ـ هل فكرت في اغلاق مدونتك؟ والسبب؟

وليه الواحد يغلق مدونته ..؟ يكفي أنه يتركها - زي مانا بافعل بحماقة - فترات طويلة مايقربلهاش .. ساعتها هاتعتبر مقفولة ضمنيا وماحدش هايعبرها بعد كده غيره - كما هو باديء في الحدوث معي - .. بس عموما .. كان عندي مدونة بالفعل قبل دي وقفلتها .. أو مش فاكر هل قفلتها يعني مسحتها بالفعل والا مجرد سيبتها "تعفّن" .. بس كنت زهقت منها وماعدش عندي رغبة في الكتابة فيها .. فنقدر نلخص الاجابة على السؤال ده ونقول - على الترتيب - أه فكرت .. عشان زهقت منها

ـ صورتك في المدونة رمزيتها؟

بما أن مش حاطط صورة في المدونة ، يبقى مش هاتكلم عنها وبالتالي لا يوجد رمزية معينة .. وإن كان ممكن نستعير المثل الانجليزي الشهير جدا ونقول إن عدم وجود صورة هو صورة جيدة في حد ذاتها

ـ لماذا دخلت عالم التدوين من الأساس؟

الرغبة في الكتابة أكيد .. أي حد بيكتب عموما عنده حماسة أنه يشوف كلامه وأفكاره الخاصة - مش الخاصة أوي - قدامه على الشاشة ، طالما وجودها في كتاب موضوع صعب أصلا .. وكمان بتلاقي ناس تتفاعل معاك ومع أفكارك وبتلاقي شركاء ليك في اهتماماتك .. وطبيعي ده له أثر ايجابي لا بأس بيه على الحالة النفسية للواحد

ـ أحلى جملة قيلت لك في وصف مدونتك؟

ماعرفش صراحة .. أصل ماكنتش باهتم بالمدونة ككل بالدرجة دي ، باهتم بكل موضوع على حدة ومناقشته .. انما كان في رد معين من
saso
وكان مذكور فيه أن كلامي هو ما دفعها للرد على الرغم من أنها في المعتاد تكتفي بالقراية .. وده فيه مدح لأسلوب العبد لله غير أن حسيت أن فكرتي وصلت بشكل كويس .. كان شيء منتاز بالفعل

ـ التعليقات بالنسبة لك أهميتها؟

شبه أهمية الزحمة على أي باب محل .. الرواج
أن الواحد يحس أن اللي بيقدمه له وزن مش بيهرتل وخلاص .. وأن الناس بتشاركه ويشاركهم .... غير طبعا شعور الزهو عند الواحد لما يلاقي موضوعه يعج بالتعليقات .. يعني لما تكتب موضوع وتنزل بعينك على خانة التعليقات وتلاقي مثلا التعليقات 2 .. تفرق كتير أوي لما تبص على نفس الخانة وتلاقي في صفر يمين الاتنين

ـ أحلى بوست كتبته مع اللينك ولماذا؟

أعتقد أنه عن الشعور بالحمق وبالنسبة ل"لماذا" فماعرفش تحديدا .. بس باحب الموضوع ده كتير ... وبرضه الموضوع اللي بعده أسطورة ملك الذباب حبيته كموضوع خفيف

ـ أفضل مدونة قرأتها؟

هو ماقدرش أتكلم عن مدونة ما ككل زي ما أسلفت ، بس ممكن أقول مواضيع أو - بحسب اللغة التدوينية اياها- بوستات قريتها وعجبتني .. وده لما بيحصل باقوم مشيّع لينك على قايمة ولاد العم .. فممكن تاخد جولة هناك وتتفرج .. وابقى قل لي رأيك

ـ أفضل بوست قرأته وضع لينكه؟

راجع الرد السابق ! .. بس اللي انا متأكد منه أني مش فاكر ايه هو أفضل حاجة قريتها .. ولو كنت فاكر فصعب أفتكر قريته فين .. والأدهى أجيب لينك كمان

لو حد قل أدبه في التعليقات إيه رد فعلك؟

هو ماحصلش عموما .. و بعدين ليه حد هايقل أدبه أصلا ؟ بس عموما بفرض حدوثه هاحذف الرد لو الموضوع كان زايد عن اللزوم .. وممكن لو عرفت أتوصل لإيميل الفاعل أبعتله ميل أنفضه شوية على جنب !!0

ـ أسوأ مدونة؟

المدونة اللي فيها أحداث ماتهمنيش .. بالتالي باهملها .. لو ده ينفع يتحط تحت تصنيف سيء أو أسوأ يبقى هو كده بالفعل .. وعموما في الكتابة مابحبش التعصب الأعمى والتعامل بأسلوب ساخر مع المخالف فكريا .. سواء كان بقى إسلامي شيوعي مسيحي .. الخ .. الأسلوب مرفوض بغض النظر عن الانتماء الفكري أو العقدي .. وبعدين لو حد قال على أسوأ مدونة وقال هي كذا ، فده هايكون سبب مباشر لحدوث ما تكلمنا عنه في الرد السابق !0

ـ أسوأ بوست أسوأ مدون؟

أكيد هايكون صاحب أسوأ مدونة !!0

ـ إيه اللي هيحصل لايميلك لما تموت؟

هايتحذف من الشركة المستضيفة طبيعي .. هايظل مفتوح بضعة أشهر وبعد كده لأن ماحدش بيدخله هايتحذف فورا .... نفس الشيء اللي هايحصل لجسدي وذكراي وأي حاجة مرتبطة بوجودي هاتنتهي مع انتهاء وجودي برضه

ـ إديت الباص وورد لحد قبل كدة؟

أنا عامة مابحبش أعمل كذا باس وورد .. كان عندي في الأول واحدة عتيدة لكل وأي حاجة .. بعدين غيرتها وبقيت باستخدم الاتنين .. وأه كنت اديتها للبعض قبل كده

ـ اسمك؟

مــهاب

ـ المشهور بيه وسط أصحابك؟

لا على حسب .. ممكن هَبز - هوبة - اسكارس ( احم كان الاسم ده من بعض زمايل الكلية ) - عبده !(ماعرفش علاقته ايه بيا ده .. يمكن له علاقة بلقبي ) .... ومش فاكر ايه تاني دلوقت .. بس السائد كان مهاب

ـ عمرك؟

شهرين وندخل في العام الثاني والعشرين وكل عام وانتم بخير

ـ برجك؟

العقرب

ـ مجال دراستك؟

حاسبات ومعلومات / قسم نظم معلومات .. بس خلصت خلاص يعني ولله الحمد و تخلصت من الكلية

ـ شخصيتك نوعها إيه؟

6 سلندر !! يعني ايه نوع الشخصية ؟؟بس عموما .. بيجيلي حالات عصبية غبية .. باحب الهدوء وباكره الصخب بشدة .. أحلى خروجة عندي لما أقعد مع انسان باحبه ونتكلم في هدوء في مكان ما ، ولا بأس من بعض التمشية الخفيفة أحيانا

ـ السفر بالنسبة لك؟

نشاط انتقالي اضطراري لقضاء مصلحة ما ، وغالبا ما ينتهي بنوم ليفسد مواعيد نومي في الأيام التالية

ـ الأكلة المفضلة؟

اللوبيا الخضراء - البازلاء

ـ الصفات اللي أخدتها من والدك؟

أظن حب القراية والاطلاع .. وفي حاجات تانية متعلقة بالجينات زي الملامح مثلا

ـ الصفات اللي أخدتها من والدتك؟

حب المرح ، وشيء من الفراسة .. ده بوجه عام

ـ أكتر 6 حاجات بتكرهها؟

ماعرفش أحدد لأن القايمة مش ثابتة .. بس عموما جمود الفكر و المجتمع المصري وقواعده الغبية وأني أتهزم في لعبة كمبيوتر في مواجهة شخص

ـ أكتر ست حاجات بتحبها؟

مش ثابتة الأخرى .. بس ممكن نقول كل ماهو عكس ال 6 اللي باكرههم

ـ الانترنت بالنسبة لك؟

لا حاجات كتير .. تقضية وقت - شويتين شات - مدونات ومنتدى - تثقيف واطلاع .... الخ

أمرره لـ

شادي

ودمتم
 
posted by سيدوفسكي at 7:39 م | Permalink | 4 comments