11‏/3‏/2007
من أول السطر

!!عودة مرة أخرى إلى التدوين
بعد حالة الملل ثم العصبية التي انتابتني في الفترة الأخيرة ، والتى ترتب عليها إلغائي مدونتي القديمة .. راودني شعور بالحنين لإنشاء مدونة جديدة ، أمارس فيها مهمتي الشهيرة "الكتابة حتى أشعر بالملل .. فأتوقف إلى أجل غير مسمى فقط كي أعود للكتابة بعدها.."..الخ

أكتب هذه المقدمة لسببين .. أولهما أنه لابد للمدونة من مقدمة.. أبسط حقوق القاريء العزيز أن يعرف كنه المدونة التي هو بصدد مطالعتها ، كي يقرر بعدها عما إذا كان سيستمر ويتوغل وينتشر .. الخ ، أم أنه ببساطة سيكتفي بهذا القدر من السخف ، ويعود للحديث مع حبيبته عبر الماسنجر

أما السبب الثاني هو أن أعلم ما أنا بصدد كتابته أصلا ! .. وهي مشكلة في حد ذاتها لو تعلم .. فإذا حددت لنفسي طريقا معينا أسلكه في المدونة ، أجد نفسي مجبرا على الالتزام به بغض النظر عما أرغب في كتابته في لحظة ما بعينها ، وهو ما لا أطيقه .. خاصة أنني لم أعرف بعد كيفية وضع تصنيف معين للمواضيع بالمدونة، مما يساهم في زيادة خنقتي وفقعي .. ولو حد ابن حلال يعرف يقولي ينوبه ثواب

عامة .. تجنبا لمزيد من الرغي والإطالة دون أي داع سوى شعوري بالفراغ .. فستكون هذه المدونة إن شاء الله خاصة بصب جام غضبي على .. على .................. على ..........................؟
آه .. حسنا .. ستكون صب جام غضبي فقط .. ليس مهما أن أحصي الآن ما سأصب غضبي عليه ، لأنى أعلم أنه كثير .. فقط كن مستعدًا لأي شيء عزيزي القاريء

قبل أن أنسى .. لا تقلق عزيزي .. لست من هواة نشر أخبار آكلي لحوم البشر ، أو إرفاق ملفات تعذيب خلق الله على يد ظبابيط الشرطة .. لا أحب رفع ضغطي بلا داع ، فلا داع أيضا لرفع ضغط سعادتك .. فاطمأن واهدأ بالا

فنكتف بهذا القدر الآن .. تكفي هذه السطور تماما كمقدمة.. وحتى تحين ساعة الصفر .. تتمنى لكم أسرة القناة الثـ ...... أااقصد .. أتمنى لكم قضاء وقت ممتع - بشكل ما -.. وحياة سعيدة - لا أدري كيف - .. وأشياء أخرى من هذا القبيل .......... و دمتم
 
posted by سيدوفسكي at 1:06 ص | Permalink |


12 Comments:


  • At 11 مارس 2007 4:31 م, Anonymous طـــه

    السلام عليكم

    يالف نهار ابيض

    مبروك المدونه الجديده يا عم وعقبال الملك

    ورينا المواضيع بقى

     
  • At 11 مارس 2007 5:22 م, Anonymous ophilia

    سيدوفسكي
    لولىىىىىىىىىىىىىى....مبرووووووووووووووك

    مبروك المدونه الجديده وربنا يبعدك عن الزهايمر...ومستنين لالىء أفكارك...لاتتأخر

     
  • At 11 مارس 2007 5:47 م, Blogger سيدوفسكي

    طه

    عليكم السلام ورحمة الله ياباشا

    الله يبارك فيك يا عمي .. نجيلكم فى الأفراح ان شاء الله

    وبعدين المدونة دي ملك على فكرة .. بس باقسط تمنها بس
    -------------------------

    Ophilia

    عقبال الأنجال إن شاء الله سعادتك .. عقبالهم نفرح بيهم يعني .. مش يجيلهم زهايمر

    وجاي ان شاء الله فى السكة .. وهانملا المدونة مواضيع .. بس انتى قولي يارب

     
  • At 11 مارس 2007 9:25 م, Anonymous ketchup ...

    انت ياض كل يوم مدونه .. انت ايه فلوسك يامه

    علي العموم الف مبروك ياحج
    بس اهبدنا كام موضوع من موضوعاتك

    الغلسه دي

    سلام يا بوب

     
  • At 11 مارس 2007 9:27 م, Anonymous مؤيد الرفاعي

    سلامو عليكم مستر دسكفري.. انت اسمك ايه؟.. انت واسمك الصعب دا!

    بداية حانقة وغاضبة وزاهقة و...

    بس الله يكرمك متقوليش انك هتنزل جام غضبك على الحكومة.. عايز اشوف حاجه تانية!..

    منور

     
  • At 11 مارس 2007 10:44 م, Blogger سيدوفسكي

    Ketchup

    ازيك يا برنززز

    شوف يا بيه .. بيقولك فى المثل أبو بلاش كتر منه .. وانا من أشد أنصار المثل ده .. فعمال أكتر من أبو بلاش أو زى مانت شايف

    وربنا يبارك فيك يا حوبيكو .. وسعادتك نزلت موضوع غلس أهو من شوية ، ابقى تعالى شقر عليه

    -----------------------------
    مؤيد الرفاعي

    ايه ياعمنا .. ايه دخلة الفضائيات اللى انت داخلها دي .. ديسكفري ايه بس ؟

    وسعادتك هي البداية أه حانقة غاضبة .. الخ .. بس ماتخافش مافيش صب جام غضب على حكومة ولا بتاع

    وهاتشوف حاجة تانية يا حبي ما تقلقش .. ومع سيدوفسكي صدقني .. مش هاتقدر تغمض عينيك

    نورتوني يا خوانا والله .. إنزل بالمغات يابني

     
  • At 11 مارس 2007 11:20 م, Blogger حــمــيدو

    مبروك يا سيدو

    سلملي عالدوما

     
  • At 14 مارس 2007 6:26 ص, Blogger سيدوفسكي

    اشطة يابو حميد يازميلي العزيز

    انا رديت قبل كده بس بالاسم بتاع تهليسات .. فمسحت الرد والخ الخ

    تعيش وتزور يا برنز .. منور

     
  • At 26 مارس 2007 4:38 م, Anonymous انا وئام

    واد يا مهاب...تعبتك معايا معلش عشان أقرأ كتاباتك..بس انت عارف أسبابى الدائمة:كريم يوسف فراس
    المهم..حتى المقدمة متماسكة,ومع إن الواحد مش ناقص كتابات غاضبة حانقة بس هأتابعك كالعادة باهتمام وتبريق!!!

     
  • At 26 مارس 2007 8:59 م, Blogger سيدوفسكي

    وئاااااااااااااام .. أختاه بنت أبي و أماه

    برضه العيال ومشاكلهم؟ .. حد قالك تخلفي سعادتك يعني ؟

    بس الكتابات مش غاضبة في ذات نفسها أوي يعني .. أنا اللي غاضب - كالعادة - انما الـ .... يوووه هاقعد أرغي كتير والا ايه .. تابعي وشوفي

    تهنئة متأخرة شويتين .. بس مش مشكلة في بيتها

    تابعي بقى واقري باقي المواضيع .. مع الحفاظ على الاهتمام والتبريق !!

     
  • At 29 مارس 2007 12:05 م, Anonymous auroramoslema

    السلام عليكم..
    سيدوفسكي..
    ألف مبرووووووووووووك..
    ويجعلها عمار..وفي ميزانك يارب..
    ومتابعين يا فندم الإبداعات..

     
  • At 29 مارس 2007 8:26 م, Blogger سيدوفسكي

    أهلااااااااااااااا .. أرورا

    عليكم السلاااام ورحمة الله وبركاته يافندم

    خطوة عزيزة يا أرورا والله

    تابعي معانا بقا .. عاوزك تنتشري كده في قلب المدونة .. ماتسيبيش موضوع غير ما تقريه وتقوليلنا رأيك