مافيش أبدا شيء وحش وشيء كويس .. أو انسان شرير و انسان خيّر .. الفكرة في التوازن بين المزايا والعيوب داخل هذا الشيء/الشخص .. أحيانا تميل الكفة لصالح المزايا ، وأحيانا يحدث العكس .... و في كلتا الحالتين نجد أن الموضوع نسبي .. بمعنى أن مسمى "مزايا" بالنسبة لشخص ما قد يكون في حكم "نص نص" لشخص آخر أو قد يكون " يععععععععععععع " بالنسبة لثالث .. نفس الشيء بالنسبة للعيوب

أي حد بيعمل شيء مضر بصحته – مثلا – زي التدخين .. طبيعي أي مدخن – زي حالاتي – مدرك و عارف الضرر الصحي جراء التدخين .. لكن هل ده بيخليه يبطل ..؟ يعني هل مثلا أول ما المدخن يعرف أن التدخين مضر بالصحة وأن القلب بيتأثر والرئة بتتأثر وكله بيتأثر و جرى ايه ياعم ضمراني ده لسة الحجر التاني – إعلان قديم – هل بيقوم متنفض من مكانه وعينه ممتلئة بالحماس والعزيمة والتصميم ويروح رامي يمين طلاق أنه ماهايدخن بعد كده ..؟

الموضوع هنا مرتبط بالتوازن اللي اتكلمت عنه في الأول .. المدخن بييجي يضع مسألة الضرر الصحي أو الحرمة الشرعية – أو على الأقل الكراهة – .. الخ في كفة العيوب ، وييجي بقى يضع في كافة المزايا المنافع اللي بتعود عليه من التدخين من وجهة نظره الخاصة .. وطول ما كفة المزايا راجحة مش هايبطل .. ولو الكفتين متكافئتين هايدخل في صراع نفسي بقى أنه عاوز يبطل و مش عاوز يبطل في نفس الوقت ، لأنه أصبح في وضع لا يمكنه من المفاضلة بين الكفتين .. أما في حالة رجحان كفة العيوب ، فهنا بتلاقي المدخن امتنع وراح رامي يمين الطلاق اياه

دايما النظرة المحايدة لأمر ما بتكون ممتازة لملاحظة مميزاته وعيوبه ، ثم بعد كده بتسهل عملية المفاضلة بينهم .. والأجمل أنها بتخلي الواحد يغير نظرته لأمور كتير في الحياة ، وبتخلي الواحد يبقى على قدر أكبر من التفهم لتصرفات الغير وأخطائهم .. فحاول دايما قبل ما تسأل حد عمل حاجة انت مش راضي عنها .. قبل ما تقوله ايه اللي انت هببته ده ، قل له بهدوء انت ليه عملت كده .. تبدأ تفهم منه سر تصرفه ، فتعرف – ولو جزئيا – نظرته للموضوع ، وتعرف بقى توازن العيوب- المميزات عنده ، فهاتتفهم موقفه - من غير ما تتخلى عن اعتراضك – و هايكون أسهل كتير أنك تعالج المشكلة بشكل كبير

المهم بقى .. خليك فاكر دايما قبل ما تحكم على شيء أو شخص أنه وحش ،اعرف أنك ممكن جوة الوحش اللي انت شايفه ده ، يكون في حاجات كتير جميلة ، بس انت اللي مش ملاحظها بس .. لأنك لما بتحكم على حاجة بيتكون جواك نفور من ناحيتها يخليك تفقد القدرة على محاولة التفهم أو إعادة التفكير، أو إنجذاب يخليك ماتاخدش بالك من حاجات كتير أو تطنش .. خلي بالك من التوازن قبل ما تحكم حكم نهائي

ملحوظة بعد ما خلصت كتابة : أنا ليه مش فاهم كلامي ..؟؟؟؟ يا للبؤس

التسميات: مقالات